کوردی      عربي       فارسی       English       Kurdi  
    
  نادیە موراد: بەدەم رشتنی فرمێسكەوە پێشوازیم لە هەواڵی رزگاركردنەوەی گوندەكەم كرد

نادیە موراد، باڵیۆزی نیازپاکی لە نەتەوە یەکگرتوەکان، رایگەیاند کە ناوچە رزگارکراوەکان لە شەنگال و دەشتی نەینەوا بونەتە گۆڕاپانی ململانێی سیاسی و سەربازی و ترسیشی ھەیە ناوچە ئێزیدییەکان لە شەنگال دابەشبکرێن بۆ سێ ناوچە یان زیاتر.
ئاوێنە: نادیە موراد، باڵیۆزی نیازپاکی لە نەتەوە یەکگگرتوەکان، دوێنێ(پێنجشەممە) لە راگەیەندراوێکدا بە بۆنەی رزگارکردنەوەی گوندەکەی، کۆچۆ، لەلایەن ھێزەکانی حەشدی شەعبییەوە رایگەیاند کە بەدەم رشتنی فرمێسکەوە پێشوازی لەو ھەوڵە کردوە و وتیشی”رزگارکردنەوەی کۆچۆ، سەرکەوتنی مرۆڤایەتییە”
نادیە موراد وتوشیەتی”بەڵام ئەم سەرکەوتنە ھێشتا تەواو نییە، ھێشتا جیھان گەلەکەم جێدەھێڵێ بۆ روبەڕوبونەوەی کۆمەڵکوژییەکی بەردەوام. گەلی ئێزیدی ماوەی سێ ساڵی یەک لەدوای یەک چاوەڕوانە، داوا لە کۆمەڵگەی نێودەوڵەتی دەکات بەجدی بڕوانێتە دۆسیەی کۆمەڵکوژی ئێزیدییەکان و مافە بنەڕەتییەکان بۆ قوربانیان دەستەبەربکات، بەڵام زۆر کەم شت کراوە، ناوچە ئێزیدییەکان، لەنێویاندا کۆچۆ، یان لەژێر دەستی داعشدا بون یاخود ھێشتا شوێنێکی پارێزراو نین لە روی ئەمنییەوە، پاش رزگارکردنیشیان”.
ئاماژەی بەوەشداوە کە ناوچە رزگارکراوەکان لە شەنگال و دەشتی نەینەوا کە لەماوەی دو ساڵی رابردودا رزگارکراون، بونەتە گۆڕەپانی ململانێ سیاسی و سەربازییەکان و وتیشی”ئەو مافە نادرێتە گەلەکەم بیروڕای خۆی دەرببڕێ. ترسم لەوەیە ئەو ململانێیانەی ئێستا بەرەو دابەشکردنی ناوچە ئێزیدییەکان لە شەنگال بۆ سێ ناوچە یاخود زیاتر بڕوات و ململانێکە لەپێناو کۆنترۆڵکردنی خاکدا بێت نەک لەپێناو کەرامەتی گەلەکەم”.
لە بەشێکی دیکەی راگەیەندراوەکەی نادیە موراددا ھاتوە”ئێزیدییەکان تا ئێستاش بە کەمترین مافەکانیان نەگەیشتون، داواکارییەکانمان بۆ رزگارکردنەوەی ناوچەکانمان، دابینکردنی پارێزگاریی نێودەوڵەتی، بەدیھێنانی دادپەروەری و راکێشانی تاوانبارانی تاوانەکان بۆ بەردەم داد، ھەموی نەھاتۆتەدی”.
ئاماژەی بەوەشداوە کە کۆچۆ پڕە لە گۆڕی بە کۆمەڵ و وتوشیەتی”دەترسم لە کۆچۆ گۆڕی شەش براکەم و زیاتر لە ٧٠٠ مرۆڤی دیکەی گوندەکەم بدۆزرێنەوە. وێڕای ئەو ھەمو برینە، سوپاسی ھەمو ئەوانە دەکەم بەشدارییان لە رزگارکردنەوەی کۆچۆ و ناوچەکانی دیکەشدا کرد، رزگارکردنی کۆچۆ پەڵەیەکی رەشە بە ناوچەوانی تیرۆرەوە، جەختکردنەوەیە لەوەی مرۆڤایەتی لەبەرامبەر تیرۆردا نابەزێ”.
باسی لەوەشکردوە “ئەمڕۆ کۆچۆ وەک جەستەیەکی بێ رۆح دەگەڕێتەوە، گوندەکەم بۆ ماوەی ١٢ رۆژ لەلایەن داعشەوە گەمارۆدرا بو، کاتێک ھاوارمان لە ھەموان کرد و داوامان کرد بە فریامانەوە بێن بەڵام بێ ئاکام بو تا ئەو کۆمەڵکوژییەمان بەرامبەر کرا، کە تێیدا پیاوان بە کۆمەڵ کوژران و لە گۆڕی بەکۆمەڵدا نێژران و ژنان و کچانمان لاقە و وەک کەنیزەک بران و منداڵانمان رفێنران”.
لە کۆتاییشدا وتویەتی”گوندەکەم، شایەتحاڵی یەکێک لە گەورەترین تاوانەکانی سەدەی بیست و یەکە، بۆیە داوا لەو ھێزانە ئەکەم کە رزگاریان کردوە پارێزگاری لە ھەمو بەڵگەکان بکەن بۆ ئەوەی شایەت بن لەسەر تاوانەکانی داعش بۆ ئەبەد”.
گوندی کۆچۆ ١٨کم لەناوەندی شەنگالەوە دورە و لەساڵی ٢٠١٤دا رێکخراوی داعش کۆمەڵکوژییەکی گەورەی تیادا ئەنجامدا‌و زیاتر لە ھەزار کەسیان کۆمەڵکوژ کرد و سەدان ژن و منداڵیشیان بەدیل گرت، کە یەکێک لەو ژنانە نادیە موراد بو کە لەدوای رزگاربونی لەداعش بوە نوێنەری نیازپاکی رێکخراوی نەتەوە یەکگرتوەکان.
ئاوێنە
ژمارەی بینین:  1275      بەروار:  26/05/2017
هیچ سەرنجێک بوونی نیە‌ .
تکایە سەرنجەکەت لێرەوە بنێرە  
   

   زیاتر
هیچ محتوای برای موضوع درخواست شما وجود ندارا‌ .
ماڵپه‌ڕی پێشوو ١
ماڵپه‌ڕی پێشوو ٢
    
Copyright 2012. All Rights Reserved.