کوردی      عربي       فارسی       English       Kurdi  
    
  ئیرادەی عەفرین‌و بێ ئیرادەیی هەرێمی کوردستان
شەماڵ عادل سەلیم
ئیرادەی عەفرین‌و بێ ئیرادەیی هەرێمی کوردستان


شەماڵ عادل سەلیم
لەدوای زیاتر لە ٥٠ رۆژ لەبەرگریی‌و بەرخۆدان، عەفرینییەکان دوێنی لەناو جەرگەی شارەکەیاندا ئاهەنگی سەرکەوتنیان دەگێرا، مناڵەکانیان سرودیان بۆ شەرڤانانی سەنگەرەکان دەچڕی‌و بەیەک دەنگ‌و بەیەک ڕەنگ پڕبەقورگیان هاواریان دەکرد (بژی بەرخۆدانا عەفرینێ).

 

ئەمڕۆ گوندەکانی نزیکی ناوەندی عەفرین و گەرەکەکانی دەرەوەو ناوەوەی عەفرین، بەچڕیی لەلایەن فڕۆکە جەنگییەکانی تورکەوە بۆردومان دەکرێن . سوپای توركیا‌و داعش ‌و خوشک و براکانی بە پێشکەوتووترین چەکی ناتۆ هەمو هێز‌و توانای خۆیان خستوەتەگەر بۆ ئەوەی شارەكە داگیر بكەن، بەڵام روبەروی ئیرادەی پۆڵایینی گەلی عەفرین بونەتەوە، شەرڤانان بەچەكی ئاسایی زیاتر لە پەنجا رۆژە خۆراگری بێوێنە نیشانی جیهان دەدەن وئەمرۆ لەهەموو کاتێک زیاتر بەهێزترو پۆلایین ترن.
من لێرەدا دەمەوێ زۆر بەکورتی باس لەئیرادەی پۆلاینی گەلی رۆژئاڤاو بێ ئیرادەیی هەرێمی کوردستان بکەم، ئەوئیرادەیەی کە بەرامبەر دووەم هێزی عەسکەری ناتۆ لە شەرێکی نابەرابەردا نەک هەر نەشکاوە، بەڵکو رۆژدوای رۆژ بەهێزتر دەبێت ، ئیرادەیەک کە لەناو هزرو مێشکی تاکی کوردی رۆژئاڤا بنیاتنراوەو بە پرەنسیپە راستەقینەکانی وڵاتپارێزی و بەرخۆدان و گیانبازی ئاودراوە، ئیرادەیەک لەسەر ئەساسی پاراستنی خاک و بەردی وڵات بنیاتنراوە، ئیرادەیەک بەرامبەر تۆپ و تەیارەی دوژمن چۆکی دانەداوە، رێک بەپێچەوانەی بێ ئیردەیی خەلکی هەرێمی کوردستان، کە لە دوای سالی ١٩٩١ وە حزبەکوردستانییەکان بەسیستەماتیک کارییان لەسەر شکاندنی ئیرادەی پرسۆناڵی کورد کردووەو لەهەموو بەها نیشتیمانپەروەری و بەها بەرزەكانی گەلی كوردستان خاڵییان کردۆتەوە کردویانەتە رۆبۆتێکی گوێ رایەڵی بێ موراڵ و بێ ئینتیما، ئێ خۆ هەرهەموومان باش لەبیرمانە لەناوەراستی ساڵی ٢٠١٤ دا، لەگەڵ نزیک بوونەوەی داعش لەسنوری هەرێمی کوردستان، زۆربەی دانیشتوانی هەرێم ،شارەکانیان چۆڵ کردوو بەرەو سنوورەکان کەوتنە رێ، لەوکاتەی هەرهەمان ئەوخەڵکە بون، لەساڵی ١٩٩١دا، دامودەزگاکانی ریژێمی بەعسی گۆربەگۆریان خستە بەرشەق و نەفرت و بەچەند رۆژێک کوردستانیان لەبەعس و بەعسییەکان پاک کردەوە، دەکرێ لەخۆمان بپرسین، بۆچی ئەو خەڵکەی، لەهەشتاکانی سەدەی رابردوو لەشەقامەکان هەولێرو سلێیمانی و دهۆک و کەرکوک و رانیاو هەڵەبجەو قەڵادزە وکۆیە شەقڵاوە ،خۆپیشاندانیان دژی ریژێمی بەعس دەکرد و وێنەی سەددامیان دەخستە ژێر پێیان وبەئیرادەیەکی پۆلاین بەرنگاری درندەترین ریژێم دەبوونەوە، بۆچی لە ١٦ ئەکتۆبەر بەبریارێکی ئیرتجالی چەند بەرپرسێک کەرکوکیان تەسلیم کردو ئالای سپیان بەرزکردەوەو ؟ بۆچی حزبەکوردستانییەکان پێشمەرگەیان لەبەرامبەر میلیشیای حەشدی شەعبی ئیرادەشکاوو مل کەچ کرد؟

بۆ وەڵامئ ئەم پرسیارە، دەبێ بگەرێینەوە سەرئەسڵی کێشەکان ، ئەویش بێ ئیرادەیی حزبە کوردستانییەکانە ئەو حزبانەی، بەسیستەماتیک لە ١٩٩١ وە کاریان لەسەر تێکشانی ئیرادەی خەڵکی کوردستان کردووە ، داروبەردی هەرێمی خێرلەخۆنە دیویان حزباندووە ، هەستی شۆرشگێریان لەلای تاکی کورد لاوازکردووە یان باشتر بڵێم هەر نەیان هێشتووە، وایان کردووە خەڵک رەحمەت بۆ ( کفن دز ) بنێرێت ، هەرئەودەسەڵاتەی بەناو دەسەڵاتی کوردی لە ٢٦ ساڵی رابردوودا ،توێژێکی پەرازیت و تەمبەڵ و بندیوارو بەڵتەجی بەرهەم هێنا وە، کە تەنها کاریان بۆتە چەپلە لێدان و هوراکێشان بۆ حزبی دەسەڵات و سوکایەتی کردن بەهەموو بەها جوانەکان ، هەرئەودەسەلاتە مافیا ئاسایەی هەرێمی بەتەمای خودا بوو ، خەبات و تێکۆشان و بەرخۆدانی ناشرین کردوە ، هەرئەودەسەڵاتە گەندەڵەی هەریم بوو بەبێ گوێ دان بە پەروەردەکردن و بنیتنانەوەی تاکی کورد کەوتە بنیاتنای ( گوندی ئەڵمانی وئیتالی و ئینگلیزو دییڤان رۆتانەو شوێنەکانی دیکەی رابواردنی شەوانەی نوخبە دەولەمەندەکەی هەرێم .هەر ئەودەسەڵاتە گەندەڵەی هەرێم بوو لە ١٩٩١ وە میللەتی کردە مشەخۆر و بەکاربەر وپاشکۆو چاولەدەستی دەسەڵات ، شتێک نەما ناوی موڕاڵ و پرەنسیپە مرۆییەکان و خەبات و بەرخۆدان و بەرگری و ئیرادە و ئینتیما بێت.

هەرئەودەسەڵاتە کوردییە بوو وای کرد ئەمرۆ لەیادی ڕاپەرینە مەزنەکەی ئاداری ساڵی ١٩٩١ کە بەرهەمی خوێنی شەهیدە نەمرەکانمانە ،خەڵک نەفرەت لە ڕاپەرین بکات و پەشیمانی دەرببرێت و بلێت : ڕاپەرین ئامانجە سەرەکییەکانی نەپێکاو بەقازانجی بەرژەوەندی گشتی هاوڵاتیان نەشکاوە و لەبری خۆشگووزەرانی بوە هۆی مالوێرانی شکاندنی ئیرادەی گەڵی کوردستان و لەدەستدانی کەرامەت و بەها مرۆییەکانی خەڵکی کوردستان!!

لەکۆتایدا ئەوەندەماوەبلێم ، لەگەڵ ئەوەی سوپای توركیا‌و چەتەكان تەنها چەند كیلۆمەتر لەناوەندی عەفرینەوە دورن ، کەچی بەرخۆدانی گەلی عەفرین و شەرڤانە گیانبازەکانی رۆژدوای رۆژ بەهێزتروبەهێزتر دەبن و دەڵێن : تا دوا دلۆپی خوێنمان بەرگری دەکەین و عەفرین چۆڵ ناکەین ، رێک پێجەوانەی خەلکی هەرێمی کوردستانی ئیرادە شکێنراو، کە سێ مانگ جارێک چاوەرێی چارەگە مووچەکەی دەکات و دەست لەدوعایەو نزاوتکا دەکات و لەخوای دەپارێتەوە کە ئەو سەدەقەیەی حکومەتە بێ ئیرادە کەی سێ مانگ جارێک وەک سەدەقە بەسەریان دابەشی دەکات بەردەوام بێت ، ئەوەیە جیاوازی لەنێوان بەرخۆدانی کۆبانی و ئیرادەی گەلی عەفرین و بێ ئیرادەیی خەلکی هەرێم وسەرکردایەتییەکەی کە قودس و دڵی کوردستانی لەپێناو چەند بەرمیلێک نەوت و چەند سەفتە دۆلارێک هەراج کرد .
تمداد ديدنى ها:  625      تاریخ:  16/03/2018
هیچ کۆمێنتێک به‌رده‌ست نیه‌ .
کۆمێنتی خۆت بنێره‌  
   

   زیاتر
عەلی مەحمود
دکتورە فائزە خەتاب عمر
1 بۆ 18 له‌ کۆی 297     
ماڵپه‌ڕی پێشوو ١
ماڵپه‌ڕی پێشوو ٢
    
Copyright 2012. All Rights Reserved.